Dişləri qorumaq üçün bu XƏTALARI etməyin

466

Dişlərin sağlamlığını qorumaq üçün əsas şərt gigiyena qaydalarına əməl etməkdir. Gigiyena qaydaları deyəndə isə ilk növbədə yadımıza dişləri vaxtında və düzgün fırçalamaq düşür. Amma dişlərə düzgün qulluq qaydalarını çoxlarımız bilmirik.

Hər gün doğru bilərək etdiyimiz yanlışlar dişlərin vaxtından tez sıradan çıxmasına, onların itirilməsinə səbəb olur. Mütəxəssislər də gündəlik yol verilən bir çox yanlışların dişlərdə, diş ətində problemlərə yol açdığını düşünürlər.

Həmin xətalar hansılardır?

Diş fırçalarını uzun zaman istifadə etmək

Bir diş fırçasının təxmini ömrü üç aydır. Təxminən 200 dəfə istifadə edəndən sonra onu dəyişməlisiniz. Uzun zaman işlənən fırça dişləri düzgün təmizləyə bilməməklə yanaşı, həm də bakteriya mənbəyi sayılır.

Dişləri lazım olduğu qədər fırçalamamaq

Fırçalamaya təxminən 1 dəqiqəyə yaxın zaman ayırmaq lazımdır. Fırçanı düzgün hərəkət etdirmək lazımdır.

Diş fırçası həm dişlər, həm də diş əti ilə təmasda olmalıdır

Ön, üst və alt dişlərin arxasını belə, fırçalamaq lazımdır. Fırçanı hər zaman 45 dərəcəlik bucaq altında tutmaq, qısa dairəvi hərəkətlər etdirmək lazımdır. Dişləri hər gün fərqli tərəfdən başlayıb fırçalamaq lazımdır. Bir dəfə sonda təmizlənən bölgəni növbəti dəfə birinci fırçalamaqla daha yaxşı təmizliyə nail olmaq olar.

Dişləri fırçalayandan sonra ağızı çox su ilə yaxalamaq

Fırçalayandan sonra ağızı bol su ilə yaxalamaq olmaz. Çünki belə edəndə diş məcununun tərkibində olan flor mənimsənilmir.

Diş fırçasını hamamda saxlamaq

Diş fırçasını hamam saxlamaq düzgün deyil. Fırça hamamdan kənarda, qapalı yerdə saxlanmalıdır. Böyüklərlə uşaqların diş fırçaları bir yerə qoyulmamalıdır.

Diş sapı istifadə etməmək

Hər gün diş sapı istifadə etməyi alışqanlıq halına gətirmək lazımdır. Diş fırçası təmas edə bilmədiyi yerlərdə, dişlərin arasında qalan qida qalıqları mütləq təmizlənməlidir.

Dili təmizləməmək

Dişlərlə yanaşı dilin üzəri də fırçalanmalıdır. Çünki dilin üzərində çoxlu sayda bakteriyalar toplanır. Dili təmizləmək həm də nəfəsdən pis qoxunun gəlməsinin qarşısını alır.

Sərt diş fırçası istifadə etmək

Bu, dişlərə, diş ətinə zərər verir. Yumşaq və ya orta sərtlikdə olan fırça seçmək lazımdır. Sərt fırça xüsusən soyuq qidalar, su qəbul edildiyi halda həssaslıq yaradaraq ağrıya səbəb olur.

Gündə iki dəfədən çox diş fırçalamaq

Dişlərigündə iki dəfədən çox fırçalamaq olmaz. Bəziləri dişlərini gündə 3-4 dəfə fırçalayır. Bu, düzgün deyil. İki dəfədən çox fırçalamaq diş ətinə ziyan verir, diş minasını aşındırır.